Javier Remirez Nafarroako Gobernuko bozeramaileak jakinarazi du apirilean Pfizerren 70.200 txerto jasoko dituztela, soilik etxe horretakoak, hain zuzen, adinekoak hartzen ari direnak; eta, zehaztu duenez, urtarrilean eta otsailean guztira (enpresa guztietatik) jasotakoak adina dosi dira.
AstraZenecaren txertoei dagokienez, Santos Indurain Osasun kontseilariak egin zuen bezala, Remirezek "lasaitasun, konfiantza eta segurtasunerako deia" egin du; izan ere, Nafarroan ia 18.000 dosi jarri dituzte jada, eta ez da albo-ondorio larririk izan.
Orain, Sendagaien Europako Agentziaren bilera eta irizpidearen zain daude. Horrek lurralde arteko beste bilera bat ekarriko du, eta bertan erabakiko dute zer egin txertoarekin. Alde horretatik, zuhurtzia estrategia ona dela azpimarratu du.
