Sergio Perez Garcia Nafarroako Gobernuko Kanpo Ekintzarako zuzendari nagusiak Eric Spitz Pirinio Atlantikoetako prefetari eskatu dio kontuan har dezala Frantziak ezarritako mugako pasabide jakin batzuk ixteak inguruko biztanleei eragiten dien kaltea, eta salbuespenak kontuan hartu ahal izatea proposatu du.
Zuzendari nagusiak azaldu zuen zer arazo sortzen ari diren Nafarroan mugako hainbat pasabideren itxierak, Frantziako Estatuak terrorismoaren aurkako borrokari buruz emandako dekretu baten bidez ezarriak. Dekretu horrek kalte egiten dio inguruko herritarrek lan edo familia arrazoiengatik behar duten mugikortasunari, eta zaildu egiten du abian diren lankidetza-proiektuak garatzea.
Prefetak, bere aldetik, erabaki horren salbuespenezko inguruabarrak azaldu zituen, eta, iragarri zuenez, epe laburrean kenduko dute, eta herritarren arazoak arintzeko neurriak aztertzeko prest agertu zen.
Sergio Perezek Pirinioez gaindiko Konferentzia Atlantikoaren Batzar Nagusian parte hartu zuen atzo. Hurbileko mugaz gaindiko lankidetza indartzeko sortu zen erakunde hori, eta bertan parte hartzen dute, Nafarroako Gobernuarekin batera, Euskadiko Gobernuak, Gipuzkoako Foru Aldundiak eta, Frantziaren aldetik, Pirinio Atlantikoetako Departamentu Kontseiluak, Nouvelle-Aquitaine Eskualde Kontseiluak, Euskal Herriko Aglomerazio Elkarteak.