Larunbatean Iruñean eginen den torturaren aurkako manifestazioarekin bat egin dute Aezkoako Batzarre Nagusiak eta Orbaizetako Udalak. Mikel Zabalza hilketaren ingurukoak argitzen dituen Gomez Nieto eta Peroteren arteko elkarrizketa biltzen duen audioak ordezkatzen dituzten herriek "sentitzen eta pentsatzen" dutena berresten duela adierazi dute: "Mikel Intxaurrondoko kuartelean torturapean hil zutela". Orbaiztarra zen Zabalza.
Zer gertatu zitzaion argitzeko ikerketa abiatu dezala eskatu diote adierazpen baten bitartez, "gertakariak argitu, justiziari helarazi eta aitorpen ofiziala egiteko". Estatuko Fiskal Nagusiak audioen inguruko adierazpenak egin ditzala nahi dute, argitu dezan "kasua berriz irekitzeko eta ikertzeko bide emateko nahiko adierazgarriak ez ote diren".
Nafarroako Gobernuari, berriz, "beste aldera begiratu" ez dezala eskatu diote. Torturak Nafarroan izandako dismentsioa ezagutzeko "beharrezko" ikerketei berrekitea galdegin diote.