Nafarroako Gobernuko Herritarrekiko Harremanetarako Departamentuak, Euskarabidearen bidez, euskara ikastaro bat antolatu du, internet bidez, Argentinako eta Uruguaiko 19 lekutako Nafar Etxeekin.
Ekimen honek Buenos Aires, Rosario, Bolivar eta Mendozan dauden Argentinako lau Nafar Etxeen eskaerari erantzuten dio. Ikastaroan parte hartzen dutenek Nafarroako kultura, geografia eta ohiturak ezagutzeko interesa erakutsi dute.
Matrikulatutako ikasleek ez zuten aldez aurretik euskararen ezagutzarik; beraz, A1 maila esleitu zaie, eta ahozko komunikazioa talde txikietako elkarrizketa saioen bidez sustatuko da.
Euskarabidearen prestakuntza ikastaroen ohiko programazio didaktikoa erabili bada ere, egokitzapenak egin behar izan dira hizkuntza eta kultura arrakaletatik eratorritako erronkak gainditzeko. Oztopo nagusia ordutegien koordinazioa izan da, Nafarroa eta Argentinaren artean lau orduko aldea baitago.
Ikasleen artean soslai eta jatorri desberdinak daude: adin ezberdinetako pertsonak dira, besteak beste, ikasleak, musikariak edo erretiratuak, esaterako, eta gehienak Buenos Aireskoak badira ere, Bahía Blanca, Rosario, Bolivar eta Montevideoko ikasleak ere badaude.