Baionan, Bilbon, Gasteizen, Iruñean eta Donostian egingo ditu manifestazio nagusiak Euskal Herriko mugimendu feministak. Dena aldatu, sistema arrakalatu leloa hartuko dute aurtengo protestek. Iruñean auzoka izanen dira mobilizazioak, 19:00etan eta 20:00etan; eta herrika ere antolatuko dituzte. "Sistema kapitalista, heteropatriarkal eta arrazista arrakalatzeko", feminismoan antolatu eta kolektiboki borrokan jarraitu behar dela defendatu dute gaur Donostian egindako agerraldian: "Krisi hau ez zen pandemiarekin hasi, eta Euskal Herriko mugimendu feministan orain ez gara isilik eta geldi egongo". Kaleak hartzea inoiz baino garrantzitsuagoa dela nabarmendu dute.