EH Bilduk aurkeztu du mozioa, eta PSNren, Geroa Bairen, Ahal Duguren eta Izquierda-Ezkerraren babesa jaso du; Navarra Suma abstenitu egin da.
Txomin Gonzalez EH bilduko parlamentariak adierazi duenez, mozioaren helburua da "15 urtetik beherako guztiei kalitatezko laguntza bermatzea"; izan ere, agerian geratu da pediatriako mediku eta erizain profesionalen falta Iruñeko Alde Zaharrean, Bortzirietan, Tuteran, Peraltan, Cascanten eta Castejonen. Txomin Gonzalezek "profesionalak fidelizatzeko eta bereganatzeko neurriak" eskatu ditu.
Egitasmoarekin, paralamentuak nahi du, gobernuak Espainiako Osasun Ministerioari eskatzea barneko mediku egoiliar plazak handitzeko eta administrazioetako lan eskaintza publikoen deialdiaren murrizketak kentzeko. Halaber, eskatu dute plan horretan sar dezatela gaur egungo pediatriako laguntza premiei erantzuteko adina lanpostu izango dituen lan eskaintza publikoaren deialdia.
Mozioak proposatzen duen beste neurri bat da diziplina anitzeko prestakuntza ikastaro bat garatzea, pediatriako arreta emango duten medikuntzako eta erizaintzako langileen ezagutza gabeziak arintzeko, pediatriako espezialisten estaldura bideraezina den kasuetan.