Espainiako Auzitegi Gorenak diligentziak ireki zizkion iragan astean Nafarroako Gobernuko Garapen Ekonomikoko kontseilariari; Sodenak Davalorri 2,6 milioi euro maileguan ematerakoan prebarikazio eta diru publikoen xahutze deliturik egon al zen argitzeko.
Instrukzioaren lehen fase honetan, gakoa da ea Auzitegi Gorenak Manu Aierdi ikertu gisa hartu duen, Nafarroako Gobernuak berretsi baitu Gorenak ikertu gisa hartzean utziko diola Aierdik kontseilari izateari; baina ez du uste oraindik baldintza hori bete denik.
Gobernuan dauden taldeek uste dute Aierdik bere karguan jarraitzeak ez duela gobernuaren irudia kaltetzen, legea ez betetzea litzatekeelako kalte egingo liokeena.
EH Bilduren irudiko ere, juridikoki Aierdi une honetan ez dago ikertua. Baina zalantzan jarri du Aierdi deklaratua izan arte karguan jarraitzea politikoki aukerarik onena izatea.
Kontrako iritzia du Navarra Sumak, ordea; autoaren berri izan eta gutxira, Javier Esparza UPNko eta koalizioko buruak aldarrikatu zuen Manu Aierdik "berehala" utzi beharko lukeela gobernua. Eta halaxe egin du berriro ere, kasu honetan, Jose Suarezek. Kargua utzi beharko duela esan du, eta bestela, Maria Txibite presidenteak kendu beharko duela kargutik.