Nafarroak 183 Covid-19 kasu berri erregistratu zituen astearte honetan PCR eta antigenoen 2.436 proba egin ostean, hau da, %7,5k eman du positibo, Nafarroako Gobernuak emandako behin-behineko datuen arabera.
Astelehenean 162 kasu erregistratu ziren, %8,4ko positibotasunarekin, eta igandean, 133 kasu, %9,7ko positibotasunarekin.
Eremuka, Erro da kutsatze gehien izan dituzten udalerrien zerrendan lehena, 15 infekziorekin. Bertan, agerraldi bat antzeman da Ibañetako adinekoen zentroko egoiliarren artean. Gizarte Eskubideen Sailak jakinarazi duenez, 17 kasu positibo atzeman dituzte zentroan bizi diren pertsonen artean. Bertan bizi diren 55 pertsonak bahetu ondoren, eraginpeko pertsonetako bat bitarteko baliabide batera eramatea erabaki da, eta beste 16ak egoitzan isolatuta egongo dira. Txertoaren lehen dosia duela astebete jaso zuten, urtarrilaren 5ean.
Barañainen, berriz, 10 infekzio atzeman dira. Irunberrin, bederatzi izan dira eta kutsatzeen ugaritzea ikusirik, udalak "etxetik ahalik eta gutxien ateratzeko" deia egin du.
Txertaketa planari dagokionez, 6.594 pertsonak jaso zuten txertoa astelehenera arte, eta 1.088 dosi eman zituzten. Atzo ia hogei egoitza-zentrotako eta komunitate erlijiosoetako 900 pertsona ingururi jarri behar zieten txertoa. Langile soziosanitarioek txertoa hartzen jarraitzen dute Refenan.
