Elurra berriro agertu da bart Nafarroako hainbat tokitan, eta lehen orduan arazoak izan dira Pagozelai parean, A-15 errepidean, istripu baten ondorioz eta mantu zuria galtzadan pilatuta zegoelako; Etxegarate, Altsasu, Lekunberri eta Belate errepideetan ere nabaritu da.
Elurteak handiak izan dira Nafarroako iparraldean eta ipar-ekialdean. Pirinioetan, esaterako, elurrak lodiera handia utzi du eta argi-mozketak eragin ditu.
Eragozpenak, errepide sarean
Elurraren ondorioz, kamioi bat gurutzatu da Areso pareen. Itxita egon da Leitzarango autobia (A-15), baina Nafarroako Gobernuak jakinarazi du ireki dutela.
Bigarren mailako errepide sarean Belaguako mendateko errepidea itxita dago (N-137, Burgi-Isaba-Iparralde, 47. kilometrotik, Juan Pitoren benta) eta beste zortzi tartetan kateak erabili behar dira: NA-2011 (Salazar-Iparralde), NA-2012 (Otsagabia-Irati), NA-2000 (Isaba-Zuriza), NA-176 (Garde-Anso) 8. kilometrotik; NA-138 (Urkiagako mendatea) 5. kilometrotik eta NA-1740 (Artesiagako mendatetik) 10. kilometrotik.