“Txibite entzun Nafarroa euskaldun” oihu artean euskararen ofiziltasuna eskatu dute ehunka lagunek Nafarroako Parlamentuaren aurrean. Euskal Herrian Euskarak taldeak antolatu du protesta. 34 urte bete dira Nafarroako Parlamentuak Vascuencearen Legea onartu zuenetik, Nafarroa hiru eremutan banatuz eta nafarren eskubideak bereiziz eta euskararen mendekotasuna iraunaraziz. Onartezina da EHE taldearen iritziz, legea indarrean izatea.
UPN Nafarroako Gobernutik atera arren, zonifikazioa gainditzeko prozesuan jauzi esanguratsurik egon ez dela eta euskaldunon hizkuntza eskubideen urraketek jarraitzen dutela salatu dute. Gobernu aldaketatik bost urte eta legearen sorreratik 35 igaro direnean, euskararen lege berria onartzeko exijitu dute.
Baina Txibiteren gobernuaren hizkuntza politikak aintzat hartuta, aurrerapausorik lortzea konplexua izango dela ohartarazi dute, eta horregatik ofizialtasunaren aldeko dinamika zabal eta indartsua sortzeko, eta horretara batzeko dei egin diete norbanako eta eragile euskaltzaleei.
