Josetxo Arizkuren preso iruindarraren askatasuna eskatzeko elkarretaratzea egin zuen atzo Iruñean Sare Herritarra plataformak. Azaldu duenez, Arizkurenek "aspalditik dauka diagnostikatua kardiopatia iskemiko larri bat. Denbora luzea darama gaixotasun larri honi baldintza gogorretan aurre egiten, urrundua Murtziako espetxean eta zigorraren hasieratik lehen graduan. Duela gutxi jakin berri genuen Logroñora lekualdatua izango zela eta bigarren gradura igaroko zutela". Sarek salatu du berandu iritsi dela aldaketa hori: "Berandu dator eta gainera ez da nahikoa! Gaixotasun larria duen presoa izanik, duela denbora behar lukeelako zigorra etxean betetzen, artatze egoki bat jaso eta gertatutakoa ekidingo zuen eremu babestu eta lasaian biziz".
Aaroaren 29an "bihotzeko baten amagoa" izan zuela esan zieten, biharamunean, berriz, bihotzekoa izan zela eta ospitalizatua dagoela: "Ez dugu beraz bere osasun egoeraren inguruko informazio garbia jaso, horrek senitartekoentzat dakartzan kezka eta beldurrak areagotuz. Guzti honi, urrundua izatearen eta ondorioz senide, konfiantzazko medikuen zaintzarik gabe egotea gehitzen zaio".