Espainiak 445.000 euro eman dizkio Nafarroako kultur sektoreari pandemiari aurre egiteko

Horietatik, 22.000 antzerkirako dira; 63.000, dantzarekin lotutako ekimenetarako; eta 360.000, lirikarako eta musikarako.

Espainiako Arte Eszenikoen Institutu Nazionalak (INAEM), Ministerioaren eta Kulturaren mendeko erakundeak, 445.000 euro eman dizkie Nafarroako antzerki, dantza, lirika eta musika arloko erakunde eta konpainiei.

COVID-19aren pandemiak eragindako jarduera beherakadagatik sektorea konpentsatzeko laguntzak dira, Gobernu Ordezkaritzak jakitera eman duenez. Ildo horretan, INAEMek birformulatu egin ditu bere urteko laguntzak, eta handitu egin ditu, egungo egoeran kultura-sektoreari laguntzeko.

Joan den uztailean egin zen ezohiko diru-laguntzen deialdia, eta orain INAEMek onuradunen behin-behineko zerrenda argitaratu du. "Lirikaren, musikaren, dantzaren, antzerkiaren eta zirkuaren arloetan kultur jarduera ahalbidetzen duten egiturak mantentzen lagundu nahi du deialdi honek", gaineratu du ordezkaritzak.

Horretarako, erakundeak 37.937.130 euro bideratuko ditu 2020an sektoreari laguntzak emateko, "iaz baino ia hiru aldiz gehiago". Kopuru osotik, 16.553.482 euro dantza, lirika eta musikako partidari dagozkio (2019an 6.008.262 euro ziren) eta 21.383.648 euro antzerkiari eta zirkoari (aurreko ekitaldian 8.035.528 euro izan ziren).