Aurrekontuen proiektua "iazko bera" dela eta "EH Bilduren menpe" dagoela argudiatuta, osoko zuzenketa aurkeztuko diola iragarri du gaur Navarra Sumako eledunak, Javier Esparazak.
PSNko eledun Ramon Alzorrizek “nafarren beharrei bizkarra ematen” aritzea leporatu dio eskuineko hirukoari, eta gezurretan ari dela ere iradoki du: “Agerian geratu da Navarra Sumak ez zuela aurrekontua onartzeko asmorik, pasa den astean onartzeko prest azaldu zen aurrekontua orain munduko txarrena dela dio... Nork sinetsiko die?”.
Antzera mintzo da gobernuko beste kide nagusiko, Geroa Baiko, eleduna, Uxue Barkos: “Edo gezurretan ari zen aurrekontuentzako txeke zuri bat eskaini zuenean, edo gezurretan ari da orain, osoko zuzenketarekin”. Politikan denak ez duela balio gaineratu du Barkosek.