Azken urteetan lan istripuak ugaritzen ari direla salatu dute ELA, LAB, ESK, STEILAS, EHNE, HIRU eta CGT sindikatuek gaur goizean egindako protesta ekitaldian. CENen egoitzan bukatu den martxan, aurten Hego Euskal Herrian hil diren langileen kopurua irudikatu dute: 53 izan dira, eta Nafarroan, zehazki, zortzi.
Baina, pandemiaren testuinguruan zenbaki horiek ez dira guztiz errealak: ezin dutelako jakin benetan zenbat hil diren lanpostuetan COVID-19 birusarekin kutsatuta.
Patronalaren jarrera kritikatu dute, prekarietatea areagotzen jarraitzen duelako, sindikatuek egiten dizkioten proposamenei uko eginez.
Nafarroako Gobernuari exijitu diote patronala egoera deserosoan jarriko duten neurriak hartzeko: alde batera uzteko elkarrizketa soziala eta osasun autoritate gisa jardun dezala: lan osasunaren institutua indartuz, eta enpresek bete beharreko neurriak betetzen ote dituzten ikuskatuz.
Osasuna eta bizitzak erdigunean jartzeko aukera ona dela iritzita, langileei dei egin diete kalera atera eta mobilizatzera.