ELA, CCOO eta UGT sindikatuek salatu dute sektoreko enpresak duela hilabete batzuk baino proposamen okerragoak aurkezten ari direla negoziazio mahaian, krisi egoera baliatuz. Horrek mahaia blokeatzea eta hitzarmena desagertzea dakarrela diote, baina patronalak berak behartutako egoera bat dela. Hortaz, xantaia leporatu diote.
Horren aurrean, bi proposamen aurkeztu dituzte: bost urterako hitzarmena, gutxieneko soldata igoera batzuekin; eta aurreraeragina hiru urtez luzatzea, sektorea normalizatu dadin.
Nafarroako Gobernuari, berriz, erantzukizuna eskatu diote, sektorean ematen dituzten zerbitzuen zati handi bat gobernuak azpikontratatutako eskola garraioari dagokiolako. Aurki, egoera salatzeko eta eskaerak plazaratzen jarraitzeko mobilizazio deialdi gehiago iragarriko dituzte.