2021ean sei igande eta jaiegunetan zabaldu ahalko dira saltokiak, aurreko urteetan baino jaiegun bat gehiago. Merkataritza Batzordeak egindako egutegi proposamena onartu du Nafarroako Gobernuak. LAB eta ELA sindikatuen ustez "atzerapauso larria" eta gobernuari "patronalaren interesen" menpe jardutea egotzi diote. "CENek erabakitzen du zenbat igande eta jaiegun ireki, eta Nafarroako Gobernuak baimena ematen die sindikatuekin inolako kontrasterik egin gabe", adierazi du ohar bidez ELAk.
LAB sindikatuak ohar bidez azaldu duenez, igandeetan eta jaiegunetan irekitzea "ez da beharrezkoa", eta "gizarteak gainerako lanegunetan beharrezko erosketak egiteko gaitasun nahikoa du, eta horrela frogatu da, batez ere udaberrian bizi ditugun konfinamendu egunetan". ELAk igande eta jaiegunetan saltokiak irekitzearen aurkako eragile guztiei batera mobilizatzeko deia egin die.