Nafarroako Gobernuak, asteazken honetako saioan, 2021erako Nafarroako Aurrekontu Orokorren aurreproiektua onartu du, 4.870,5 milioi eurokoa, aurreko urtean baino %6,49 gehiago. Gastu ez-finantzarioaren muga 4.481,4 milioi eurokoa izango dela aurreikusi dute, hau da, 224,8 milioi euro gehiago. Finantza gastuek 389 milioi euro suposatuko dute.
Gobernu bileraren osteko prentsaurrekoan, Elma Saiz Ekonomia eta Ogasun kontseilariak azaldu du aurrekontuen zatirik handiena arlo sozialean kokatzen dela, arreta berezia jarriz Osasunari, Hezkuntzari eta Gizarte Eskubideei, aurrekontu ez-finantzarioaren % 55,06rekin. Proiektua "Nafarroako historiako anbizio handienekoa" dela adierazi du, eta "Nafarroa suspertzeko izango duten garrantzia" azpimarratu du. Halaber, esan du pandemiak zeharkatzen duela aurreproiektua; zehazki, Covid-19ari aurre egiteko 150 milioi eurotik gora aurreikusten dituzte.
Aurreproiektua gobernu bilkuran onartu ostean, dokumentua Ekonomia eta Gizarte Kontseilura, Toki Araubidearen Foru Batzordera eta Ingurumen Kontseilura bidaliko da, aztertu eta txostena egin dezaten, foru lege proiektu gisa behin betiko onar dezaten. Ondoren, Nafarroako Parlamentura igorriko da, eztabaidatu eta onar dezan.
