“Pandemia gelditzeko neurriak behar ditugu, behingoz, egoerak okerrera egin ez dezan. Ez da neurri arbitrarioak hartu eta kontrol sozialean sakontzeko ordua”. Hala adierazi dute Ernaiko kideek Nafarroako Jauregiko atarian egindako ekitaldian.
“Arduraz” jokatzeko unea dela diote, “irtenbide kolektiboak bilatzekoa”. Herritarrak horretarako prest daudela diote, “denen ongizateagatik” esfortzua egiteko; baina galdera egin dute: “Non dago arduradun politikoei dagokien bestelako lan guztia? Non daude inbertsioak? Non daude baliabideak?”.
Hori dela eta, Hego Euskal Herriko gobernuei “gutxieneko” zehatz batzuk bermatzeko eskatu diete: garraio publikoa indartu, hezkuntza ratioak jaitsi, alokairuaren ordainketak eten, lanpostuak defendatu, oinarrizko errenta bermatu eta kriminalizazioa gelditu. “Zerbitzu publikoen defentsan, irtenbide kolektiboak eraikiz”.
Pandemiari “eraldaketa soziala oinarri eta bizitzak erdigunean jarriz” erantzuteko lan egingo dutela berretsi dute, eta herri eta auzoetan “neurri eraginkorrak” lortzeko antolatu eta mobilizatzera dei egiten diote euskal gazteriari.