Nafarroako ospitaleetan 31 pertsona ospitaleratu zituzten atzo, hiru ZIUn, eta zazpi pertsona hil ziren COVID-19aren ondorioz. Beraz, arrazoi horrek eragindako heriotzen kopurua, guztira, 695 da.
Zonaldeka, Iruñerrian positiboen %60 erregistratu da, Tuteran %20, eta Lizarran %8. Gainerako positiboak (%12) Nafarroako beste eremu batzuetan daude.
Erregistratutako kasuen banaketari dagokionez, adin-tarteen arabera, talde nagusia 45 eta 59 urte artekoa da, guztizkoaren %26. Jarraian, 15-29 urteko eta 30-44 urteko taldeak daude (biak %19); ondoren, 60-75 urteko taldeak eta 15 urtetik beherakoak (biak %15); eta, azkenik, 75 urtetik gorakoak (guztien % ). Kasu berrien batez besteko adina 41,3 urtekoa da.
Generoari dagokionez, kasuen %52 emakumeak dira eta %48 gizonak.
Nafarroako ospitale-sarean 387 pertsona daude ospitaleratuta COVID-19arekin (atzo baino bederatzi gutxiago); horietako 50 ZIU postuetan daude (atzo bezala) eta beste 68 etxean ospitaleratuta. Gainerakoak, 269 paziente, plantan daude.
Osasun Sistema Publikoko profesionalei dagokienez, Osasunbidea-Nafarroako Osasun Zerbitzuak jakinarazi duenez, gaur egun 167 aktibo daude, eta azken astean 82 kutsatu berri izan dira.
Kutsatzeen %60 bizikideen, senideen eta lagunen artean gertatzen da
Prentsaurrekoan, Marian Nuin ISPLNko zuzendariak azken txosten epidemiologikoa aurkeztu du, urriaren 19tik 25erako asteari dagokiona. Txosten horretan oraindik ez dira jasotzen indarrean dauden neurri murriztaileak, 2-3 asteko denbora behar baitute horren eragina ikusteko.
Hala, txostenaren arabera, 3.929 kasu baieztatu dituzte PCR edo antigeno bidez (595 kasu 100.000 biztanleko), aurreko astean baino %16 gehiago. Kasu berri horien %68 sintomatikoak ziren, eta %63 baieztatutako beste kasu batzuetako kontaktuak.
Gora egin du etxeko transmisioak (kasuen %39), bai eta beste batzuen kategoriako transmisioak ere (lagunekin eta elkarrekin bizi ez diren senideekin izandako harremanak barne). Horrek adierazten du kutsatze asko "konfiantzazko" inguruneetan gertatzen direla. Bi egoera horien artean daude kutsatze berrien %60. Lan- eta eskola-esparrua kutsatzeen %5ekin lotu zen.
Intzidentziak gora egin du Iruñean (536, 100.000 biztanleko) eta Lizarran (317, 100.000 biztanleko), eta egonkortu egin da Tuteran (609, 100.000 biztanleko); beraz, alde geografikoak murriztu egin dira.
Urriaren 19tik 25era bitartean, 261 pertsona ospitaleratu zituzten COVID-19agatik; aurreko astean, berriz, 148 izan ziren (+%76). Zainketa intentsiboetako unitatean 23 ospitaleratze izan dira, aurreko astean baino gehiago (18), eta COVID-19ari egotz dakizkiokeen 29 heriotza (32).
20. astetik aurrera baieztatutako kasuen artean, % 64 sintomatikoak izan ziren; % 5,5ek ospitaleratzea behar izan zuten; milatik 5 ZIUn sartu zituzten eta milatik 6,4 COVID-19aren ondorioz hil ziren. 20. astetik aurrera baieztatutako COVID-19 kasuen artean ospitaleratze-arriskua nabarmena da 5 urtetik beherakoen artean, behera egiten du 5 eta 14 urte bitarteko haurren artean, eta gora egiten du pixkanaka hurrengo adin-taldeetan. 65 urtetik gorakoen kasuan, % 10etik gorako proportzioan sartzen dira eta, 75 urtetik aurrera, % 20tik gorako proportzioan. ZIUn 25 urteko taldetik aurrera izan dira ospitaleratzeak, eta 45 urteko taldetik aurrera heriotzak.
