Naziek atxilotze eta akabatze esparruetara, getoetara eta bortxazko lan faktorietara eraman zituzten milaka pertsonen artean, baziren jatorria Bidasoan zutenak ere. 90 bizilagun inguru deportatu zituzten Hendaiatik, Irundik, Bortzirietatik eta Hondarribitik, eta 29 erail zituzten.
Kepa Ordoki-Memoria Historikoa Bidasoan elkarteak Berako Udalaren laguntzarekin antolatutako erakusketaren bitartez, pertsona horiek pairatutakoa azaleratu eta ezagutarazi nahi dute.
Erakusketa antolatu duen elkartearen ustetan, Ipar Euskal Herrian eta Frantziar Estatuan gehiago landu dute deportazioaren gaia; Bidasoko hegoaldean, berriz, ezezagunagoa da. Hala ere, azken urteetan memoria historikoa lantzeko eta gaia argitara ateratzeko ahalegina egiten ari dira.
Erakusketa osatzeko, lan akademikoak erabili dituzte, eta deportatuetako batzuen senideekin ere harremanetan izan dira. 27 panelekin osatu dute, eta ostiralean zabalduko dute, bost terdietan, Berako kultur etxean; ondoren Azken bidaia dokumentala proiektatuko dute eta emanaldia bukatzean Enara Goikoetzea zuzendariarekin solasaldia izango da. Frantxia Alzuet eta Comète Sarearen nondik norakoak azaltzen ditu dokumentalak.