Nafarroako Gobernuak beste zazpi egun naturalez luzatuko ditu (urriaren 8ra arte, osteguna barne) COVID-19ak eragindako kutsatzeen kurba murrizteko prebentzio-neurriak, irailaren 11n onartutakoak, eta aldaketa batzuk egingo ditu txikizkako saltokietako eta merkataritza-guneetako edukierei dagokienez. Neurri horien luzapena eta aldaketak, COVID-19ari eusteko Nafarroako Gobernuaren estrategia globalaren barruan kokatzen direnak, indarrean sartuko dira gaur gauerditik (urriak 2, ostirala) aurrera.
Gainera, San Adriango Udalarekin lankidetzan, Osasun Departamentuak ezohiko neurri sorta bat onartu du, 6.000 biztanle baino gehiagoko udalerri horretan COVID-19aren hedapena geldiarazteko. Azken 14 egunetako intzidentzia metatua 1.399 kasukoa da 100.000 biztanleko. Aparteko neurri murriztaile horiek Peralta, Faltzes eta Funes bezalako herrietan azken asteetan aplikatu direnen antzekoak dira.
Foru Exekutiboak San Adriango udalerrirako hartutako neurriak ostiral gauerdian sartuko dira indarrean (datorren larunbatean, urriaren 3an, 05:00etan), eta ordutegiei, edukierei eta talde bakoitzeko pertsona-kopuruari dagokienez murrizketak izango dituzte, eremu publikokoak (ostalaritza, merkataritza, kirola, kultura, etab.) eta pribatukoak, baina baita mugak ere ezinbesteko joan-etorrietarako erreserbatuta geratzen diren herriko irteeretarako eta sarreretarako. Neurri horiek dagoeneko aplikatu dira beste batzuetan.
Jarduketak, Osasuneko kontseilariaren foru agindu bidez onartuak, astebete iraungo du hasieran, eta egoera epidemiologikoaren bilakaeraren arabera luza daiteke.
Agerraldia, Mutiloako adinekoen egoitza batean
Mutiloako adinekoen egoitza bateko 19 pertsonak positibo eman dute Covid-19n azken orduetan. Horietako hiruk sintomak dituzte, eta beste 16k sintomarik gabeak. Horietako bat ere ez dute ospitaleratu, eta, oraingoz, egoitzan jarraitzen dute, isolatuta, baina dagoeneko hiru pertsona lekualdatzea kudeatzen ari dira, zentroa hobeto sektorizatzeko, Nafarroako Gobernuak jakitera eman duenez.
Datozen orduetan 60 egoiliarri eta egoitzako langileei PCR probak egitea ere aurreikusi dute, baina oraingoz ez dago positiborik zaintzaileen artean.
Mutiloako zentroan 167 erabiltzaile daude. Zentroetako agerraldietarako protokoloek ezartzen dutenaren arabera, irteerak eta bisitak etenda geratuko dira normaltasuna berrezarri arte.
Azken astean, egoitza-zentroetan kasu aktiboen kopuruak gora egin du, batez ere duela egun batzuk Villafrancan identifikatutako agerraldiaren ondorioz. Une honetan, Mutiloan atzemandako azkenekoez gain, 88 kasu aktibo daude adienekoen egizetan. Horietako sei erietxeetan daude (aste hasieran baino bat gutxiago); 22, berriz, sintoma-egoitzetan daude, eta 40 ere ez dute sintomarik. Iruñeko eta San Adriango bitarteko baliabideetan 20 pertsona daude.