Bularreko minbiziaren aurkako lasterketarekin biltzen duen dirua ikerketara bideratzen du urtero Saray Elkarteak. Iaz, esaterako, 75.000 euro inbertitu zituen hiru ikerketa proiektutarako, eta 2015etik, 358.000 euro. Elkartasuna baita Sarayren oinarri eta motore nagusia.
Aurten, ordea, ezin izango dute lasterketa egin. Baina minbiziak etenik ez duen moduan, elkartasunak etenik ez izatea bilatzen dute. Horretarko, Bizi kilometroak donazio kanpaina jarri dute abian: nahi duen orok bere ekarpena egin ahal izango du, dortsal birtual bat erosita, bost euroko prezioan.
Iaz 15.000 dortsal saldu zituzten, eta aurten, kopuru hori gainditzeko helburua dute; 2.020an jarri dute zerumuga, urtearen zenbakian.
Baina ez da hori izango aurtengo proposamen bakarra. Utero bezala, urriaren 25ean Nafarroa arrosaz tindatzeko deia ere egin baitute, Bularreko Minbiziaren Nazioarteko Egunarekin bat eginez, gogorarazteko, pandemia batean egonda ere, minbiziak hor jarraitzen duela, eta baita haren kontrako borrokak ere.
Erosteko epea zabalik
Dortsal birtuala eskuratu eta ekarpena egiteko epea zabalik dago jada, eta hilabete amaierara arte iraungo du. Sarayren webgunean (www.asociacionsaray.com), elkartearen Ermitagaña kaleko egoitzan edota La Caixaren bulegoetan (elkartearen kontu korrontean: ES10-2100-5312-21-0200073106) erosi ahal izango da.