Nafarroako Gobernuak, Eduardo Santos Migrazio Politiken eta Justiziaren kontseilariaren bitartez, Moriako (Lesbos, Grezia) kanpalekutik atera behar izan dituzten errefuxiatuak hartzeko dauden baliabideak eskaini dizkio Espainiako Gobernuari. Horretarako, Eduardo Santosek gutun bana bidali die Jose Luis Escrivá Gizarte Segurantza, Inklusio eta Migrazio ministroari eta Hana Jalloul Migrazioen Estatu idazkariari.
Gobernutik igorritako testuan, Morian bizitako tragediak "Nafarroako iritzi publikoa hunkitu" duela aitortzen da, eta arrazoi horrekin agerian geratzen da Nafarroak premia horrek eragindako pertsonak hartzeko duen borondatea. Gaineratzen duenez, dagoeneko erabilgarri dauden eta une honetan libre dauden baliabideetan egin dakieke harrera.