Sei pertsonara mugatu ditu bilerak Nafarroako Gobernuak, eremu publikoan. Sei pertsona elkartu ahalko dira gehienez, beraz, aurrerantzean; ez bada bizikideak direla, kasu horretan ez dago mugarik. Gomendioa eman zuen gobernuak aste hasieran, baina arau da orain neurria: nahitez bete beharrekoa.
Eremu pribaturako gomendioa da neurria, eta gehienez ere sei lagun elkartzeko mezua zabaldu du Santos Indurain osasun kontseilariak.
Neurriak
- Peña eta elkarte gastronomikoak itxiko ditu. 500 biztanle baino gutxiagoko herrietan, tabernarik ez badago ez da derrigorrezkoa izanen.
- Tabernak: 12:00tik aurrera, ehienez sei pertsonako taldeak hartu ahalko dira establezimenduetan, eta soilik mahaian eserita. Barran kontsumitzea galarazi egin du goberuak.
- Ospakizunak: %50ko edukiera muga izanen dute ospakizunek, itxitako eta irekitako guneetan.
- Alkohola: Salmenta galarazita izanen dute dendek 22:00etatik aurrera; ez, ordea, tabernek.
Bihar, Nafarroako aldizkari ofizialean argitaratzen direnean, jarriko dira indarrean neurriak. Hamabost egunez izanen dira indarrean eta ondoren berrikusi eginen ditu gobernuak.