Oier Sanjurjo Osasunako egungo kapitainak talde gorritxoaren elastikoa janzten jarraituko du, gutxienez beste bi denboraldirako; izan ere, Osasunak iragarri du 2022ko ekainera arte luzatuko duela haren kontratua, orain arte klubarekin hitzartuta zuena baino denboraldi bat gehiago.
Hala, klubak aitortu egin dio taldeari egindako ekarpena, Osasunak bigarren denboraldia egingo baitu jarraian Lehen Mailan.
Sanjurjok 34 urte ditu eta bere kirol ibilbideko unerik onenetako batean dago, talde nafarrak Lehen Mailan jarraitzearen arrakastaren oinarrietako bat delarik; zutabeetako bat. 274 norgehiagoka jokatu ditu oraingoz Nafarroako taldearekin, eta horrela, partida ofizial gehien jokatu dituen futbolaria da. Datorren larunbatean 12. denboraldia hasiko du taldean.