Donostiako Zinemaldiko Zinemira sailan estrainatuko dute Non dago Mikel? dokumentala. Amaia Merino (Donostia, 1970) –Asier ETA biok (2013, Irizar Saria) filmaren idazle eta zuzendarietako bat– eta Miguel Ángel Llamas 'Pitu' (Noain, Nafarroa. 1980) zinemagileek elkarrekin zuzendu dute filma, eta Mikel Zabalza orbaiztarraren desagerpena kontatuko dute.
#68SSIFF #EuskalZinema #Zinemira | @AmaiaMerinoUnzu eta Miguel Angel Llamasen @NonDagoMikel? / Where is Mikel?’ filmak, Mikel Zabalzaren desagerpena kontatzen du: 1985ean Guardia Zibilak atxilotu eta 20 egun geroago hilik aurkitu zuten. Inor ez dute oraindik epaitu edo zigortu. pic.twitter.com/SMo6889NNS
— Festival de San Sebastián (@sansebastianfes) August 27, 2020
Amaia Merinok eta Miguel Angel Llamas 'Pitu'-k zuzendu dute filma. Azaldu dutenez, Mikel Zabalza atxilotu eta agertu bitartean igarotako hogei egunen kontaketa eginen du filmak. Bi ardatz izanen ditu fimak: "Alde batetik, Ion Arretxe ezagutu dugu, filmaren protagonista izanen da. Mikelekin batera atxilotu zuten eta berak tortura bera eta ondoren horren inguruan egindako hausnarketa azalduko dizkigu. Bestetik, Mikel Zabalzaren ilobak izanen ditugu. Egiaren aldarrikapenean emandako lekuko aldaketa ikusiko dugu". Eitb-k 1985ean hartutako irudiekin osatuko dute filma.
Izar Films ekoiztetxeko Amaia Arandiak argitu duenez nazioarteko zinemaldietara eraman asmo dute. "Zinema aretoetan banaketa mugatu bat ere eginen dugu, Euskal Herrian eta estatuan. Ondoren, Euskal Herriko hainbat txokotara eraman nahiko genuke, kultur etxeetara, esaterako". Eitb-k parte hartzen du proiektuan, beraz, telebista bidez ere izanen da filma ikusteko aukera etorkizunean. "Beste telebista batzuekin ere ari gara hizketan, eta plataformaren batean edo egonen dela aurreikusten dugu", zehaztu du Arandiak.
35 urte
1985. urteko azaroaren 26an atxilotu zuen Guardia Zibilak Mikel Zabalza orbaiztarra, Donostian. Desagertutzat jo zuten. Bertsio ofizialaren arabera, guardia zibilek Endarlatsara eraman zuten Zabalza, ustezko zulo baten bila, eta ihes egin zuen, Bidasoa ibaira salto eginez. Hogei egun joan ziren, ustez desagertutako tokia goitik behera miatu zuten, eta, azkenean, Guardia Zibilak berak aurkitu zuen gorpua, Bidasoko uretan, abenduaren 15ean.