SOS Nafarroara egindako dei baten arabera, motorzale batek istripua izan zuen, eta amildegi batera erortzeko zorian zegoen; ondorioz, Luzaide herriko suhiltzaile boluntarioak, Auritzeko suhiltzaileak, suhiltzaileen erreskate teknikoa, guardiako mediku taldea eta Foruzaingoa bertaratu ziren, Nafarroako Gobernuak jakitera eman zuenez.
Auritzeko suhiltzaileek motorzalea sakanetik atera eta errepidera igotzea lortu zuten, baina bertan hil zen.
Bestalde, zazpi pertsona zauritu ziren N-121-A errepidean, Sunbilla parean, auto batek eta furgoneta batek talka eginda. Ezbeharra errepideko 49. kilometroan gertatu zen, eta zirkulazioari eragin zion.
Zaurituak, ibilgailu batetik lau eta bestetik hiru, Doneztebeko osasun zentrora eraman zituzten. Guardia Zibileko trafikoko eta herritarren segurtasuneko patruilak gertatutakoa ikertzen ari dira.