82 kasu berri eta bost ospitaleratze izan ziren larunbatean Nafarroan, Osasun Departamentuaren datuen arabera. Ostiralean 63 kasu berri eta ospitaleratze bat izan ziren.
Agerraldi nagusien bilakaerari dagokionez, Mendillorrikoak 9 kasu berri izan ditu, eta guztira 170 dira. Tuterako ezkontzaren agerraldiak 51 laguni eragin die. Uztailaren 6an Iruñean egindako bazkariaren agerraldiak zazpi kasu gehiago izan ditu, eta dagoeneko 33 dira. Eta Iruñerriko beste agerraldi batean beste bi kasu zenbatu dituzte, 18 guztira.
Gainera, bost agerraldi "txiki" izan dira Iruñean eta eskualdean, aurretik jakinarazitako kasuekin, Foru Gobernuak azaldu duenez.
Larunbatean, Osasun Sailak 1.948 PCR proba egin zituen, orain arte egindako proba kopururik altuena.
Asteburuan, gainera, PCR probak egin dizkiete Mendilloriko gazte guztiei, eta bihar jakingo dira emaitzak. Erabakigarria izango da agerraldi horren bilakaeran.
