Baloreen Merkatuko Batzorde Nazionalari helarazitako idazkian, enpresak hiru argudio eskaini ditu Agoizko lantegia ixteko.
Lehena, lantegia txiki geratu dela generadore handiak ekoizteko. Agoitzen 132 metrokoak egiten dituzte eta enpresak dio 170 metrokoen alde egin nahi duela apustu. Bigarrena, ekoizpen kostuak altuak direla. Eta hirugarrena, Agoitz itsasotik, portuetatik urrun dagoela.
Hain zuzen ere apirilean, Siemens Gamesak lantegi bat erosi zuen Portugalen, Senvienen, itsaso ondoan. Erosketari susmo txarra hartu zioten Agoizko lan batzordean. Atzo bertan bilera egin zuten Nafarroako Gobernuarekin, gaia jorratzeko. Kasualitatearen handia: atzo bertan iragarri zuen enpresak ixteko asmoa.
Gamesak hainbat diru laguntza publiko jaso ditu duela hamar urte Agoitzera etorri zenetik. Nafarroako Gobernutik, Manu Aierdi kontseilariak iragarri du enpresarekin, lan batzordearekin, eta Espainiako Gobernuarekin mintzatuko dela, aukera guztiak aztertzeko.