LAB, Steilas, CCOO, ELA, UGT, ESK eta CGT sindikatuek Nafarroako Gobernuari eskatu diote helegitea jar dezala Skolaeren ezarpena baliogabetzen duen Nafarroako Justizia Auzitegi Nagusiaren epaiaren aurka eta "egin ditzala beharrezko aldaketak programak aurrera egin dezan, beharrezko lege neurriak jarriz".
"Nafarroako Gobernuak eta Hezkuntza Departamentuak dena eman behar dute berdintasunaren alde, eta eskuina poztu beharrean, erasoei aurre egin eta hezkidetzan eta berdintasunean oinarritutako hezkuntza inklusiboaren alde egin behar dute argi eta garbi", aldarrikatu dute.
Ohar baten bidez azaldu dutenez, Foru Exekutiboak "ez du programa behar bezala ezartzeko behar den ahalegina egiten", eta "Skolae programa ezartzeari uko egiten dioten eskolak finantzatzen jarraitzen du".
Erakundeek babesa adierazi diote programari, eta iritzi diote "berdintasunaren alde ez lan egitea eta hezkidetzan oinarritutako curriculuma ez bultzatzea berdintasunaren aurkako erasoa" dela, "eta horrek bai urratzen dituela haur, nerabe eta, oro har, gizarte osoaren eskubideak". "Gaurko haurrak biharko helduak izango dira. Hezkidetzan, berdintasunean eta askatasunean hazten baditugu, gizarte justuagoa izango dugu ", azpimarratu dute.
Sindikatu horientzat, "ezinbestekoa da Nafarroako botere erreakzionario judizial, hezitzaile, mediatiko eta politikoei aurre egitea eta Nafarroako Gobernuak eskuin muturraren erasoak irmoki salatzea".
