Atzo ez zuten koronabirus kasu berririk erregistratu Nafarroan, ez eta gaixotasun horrekin hildakorik ere. Pandemia hasi zenetik kopuru horiek erregistratu dituzten lehen aldia izan da.
Halaber, aurreko egunarekin alderatuta, ospitaleratzeen datuak ez dira aldatu, foru exekutiboaren datuen arabera. Beraz, une honetan 40 pertsona daude ospitaleratuta, horietatik sei ZIUn eta bi etxean.
Hala ere, Espainiako Gobernuko Osasun Ministerioaren eta Nafarroako Gobernuko Osasun Departamentuaren arteko desadostasunak bere horretan dirau. Hala, Ministerioak 5.311 koronabirus kasu eta 490 hildako zenbatu ditu Foru Erkidegoan. Nafarroako Gobernuak, berriz, 5.352 kasu eta 518 hildako ditu erregistratuta.
Maria Txibite Nafarroako Gobernuko presidenteak "zuhurtzia" eta "erantzukizun indibiduala" eskatu ditu datorren igandean, hilak 21, hasiko den normaltasun berria delakoaren aurrean. Hain zuzen ere, egun horretan alarma egoera desagertuko da, Espainia osoan mugitzeko aukera emanez.