Black Lives Matter edo beltzen bizitzek axola dute, balioa dute, nazioarteko aldarria, heriotza eta jazarpen arrazistaren aurrean, baita Iruñean ere. Koronabirusaren itxialdi egunetan, Nafarroan 12.500 isun jarri du poliziak, gaur eragile anitzek salatu dutenez, azalaren kolorearen araberako salaketak izan dira kasu gehienetan.
Gehienei, alarma egoera ez betetzea baino, mozal legearne kontrako delituak leporatzen dizkiete, hain zuzen poliziei kasurik ez egiteagatik. Gaur, Paperak eta Eskubideak denontzat, Iruñea Harrera Hiria, Karabana Mugak Zabalduz, Salhaketa eta SOS Arrazakeriak eragileek egoera salatu dute Iruñeko udaletxe plazan. Mozal legean oinarritutako isunek, arrazoi juridikorik ez dutela azaldu dute eta horrela berretsi duela estatuaren abokatuak."Mozal legeak, polizien aginduak ez betetzeagatik isunak aurreikusten ditu" azaldu dute, "Aipaturiko arauak, polizia-agente baten ´agindu-zuzena´ betetzen ez den egoerarako pentsatuta dagoen araua da, eta orain beste ustezko arau hauste batetarako ezarri nahi da".
Eragile hauek kexa jarri dute Arartekoan eta honek aintzat hartu du eskatutakoa. Horrexegatik, egun hauetan isuna jaso dutenei edo jasoko dutenei helegitea aurkeztera animatu nahi dituzte eta beren laguntza ere eskaintzen dute horretarako. Ordaindu dutenek ere, oraindik ere errekurtsoa jar dezaketela aipatu dute.