Iker Vicente Saralegi otsagabiarrak erronka solidario bati aurre egingo dio ekainaren 14an, igandearekin, 12:15ean, Nafarroa Arena aretoan. Enborrak mozteko errekorra lortzen saiatuko da, koronabirusaren ondorioak arintzeko ikerketarako dirua biltzeko.
Erronka 54 kanaerdikoko hamalau enbor ebakitzea izango da, 27 minutu eta 17 segundo baino gutxiagoko denboran. Marka hori 1995eko abuztuaren 15etik dago indarrean: Donato Larretxeak lortu zuen, Donostian egindako proba batean.
Errekor saiakera ETBk emango du, eta seinalea bere lehen katean zabalduko du, baita nazioarteko kanalean eta streaming bidez ere. Horrela, ahalik eta ikusle gehienengana iritsiko da.
Pandemiaren aurka borrokatzen lagundu nahi duten enpresen edo partikularren ahalik eta ekarpen ekonomiko gehien lortzea da Vicenteren helburu solidarioa. Ekarpen horiek CIMAra, ikerketa mediko aplikatuko zentroara, zuzenduko dituzte zuzenean, zeinak covid-19ari aurre egiteko hainbat proiektu baititu irekita.