Lau hildako eta 23 positibo berri erregistratu dituzte Nafarroan

  • Guztira, 5.006 positibo eta 484 hildako izan dira pandemiaren hasieratik.
  • 95 lagun gehiago sendatu dira; osotara, 2.827.

Espainiako Gobernuko Osasun Ministerioaren datuen arabera, azken 24 orduetan 23 koronabirus kasu berri erregistratu dituzte Nafarroan, PCR proba bidez baieztatutakoak. Hala, 5.000 kasuren langa gainditu du Nafarroak: epidemia hasi zenetik erregistratutako positiboen kopurua 5.006 da.

Hildakoei dagokienez, kopurua aurreko egunetakoen antzekoa da: lau pertsona zendu dira azken egunean. Guztira, 484 dira hildakoak.  

Alde positiboari erreparartuta, atzo ez zuten inor ospitaleratu behar izan, eta sendatutakoen kopuruak kutsatutakoena baino nabarmen handiagoa izaten jarraitzen du: 95k jaso dute alta epidemiologikoa. Osotara, 2.827 dira sendatutakoak.