Hainbat gairi heldu diote Floren Aoizek eta Aingeru Epaltzak solasaldian. Batetik, Aoizek nabarmendu du askatasunaren defentsa egitean eskuinak eta ezkerrak eskatzen dutena ezberdina dela, eskuinak askatasun indibidualak eskatzen baititu, merkatuaren mesederako; eta ohartarazi du alde horretatik eskuinak “gol batzuk” sartu dituela eztabaida horri dagokionez.
Epaltzak, bestalde, kontrolaren gaiari heldu dio, azken egunetan Iruñerria dron bidez ikuskatzen ari baitira, eta horri lotuta, salatu du kontrol soziala areagotuko dela krisialdian. Aurrera begira datorrenari erreparatuta, berriz, adierazi du birus batek halako krisi ekonomiko eta sozial larria ekarri ahal izateak erakusten duela atzetik "oso arazo sakonak" daudela sisteman.
Hala ere, biek uste dute gehiago izan direla itxialdi garaian barruan duten “elkartasuna” atera duten pertsonak, barruan duten “polizia” atera dutenak baino.
Bihar, Inma Errea eta Amaia Nausia Pimoulier izango ditugu gonbidatu, prozesuaren azterketa egiteko.