ELA, LAB, ESK, Steilas, Hiru eta Etxaldek maiatzaren 1ean irudi komun bat partekatuko dute "egungo salbuespen egoeran mezu bateratu bat emateko".
"Koronabirusaren krisiak eta aurretik bizi dugun krisi sistemikoak sindikalismoaren erantzuna behar du", azpimarratu dute sindikatu horiek ohar baten bidez. Gainera, balkoietan eta leihoetan irudi komun hori jartzera deitu dute, "Langileen indarra eta aldarrikapena ikusarazteko".
"Maiatzaren Lehena modu koloristan aldarrikatu eta ospatu nahi dugu", adierazi dute erakunde horiek, "Kapitalaren etorkizun beltzaren aurrean, bizitza erdigunean kokatuko duen etorkizuna marraztu nahi dugu, kolorez eta dinamikaz betetako etorkizuna".
Irudi hori presente egongo da sindikatu bakoitzak argitaratzen dituen kartel digitaletan, bideoetan eta bestelako euskarrietan. Horren harira, sindikatuek herritarrei dei egin diete irudi hori beren balkoietan eta leihoetan jartzera, "Dela inprimatuta, dela eskuz eginda".