ELA sindikatuak Nafarroako Gobernuari eta udalei eskatu die, "une korapilatsu honetan", administrazioek azpikontratatutako enpresentzat lan egiten duten pertsonen lan baldintzak defendatzeko. Azpimarratu du ez dela onartu behar azpikontratatutako langileen enplegua murriztea, ezta haien lan eta soldata eskubideak ere.
Azpikontratatutako enpresa batzuen aldetik "iruzur egoerak" gertatzen ari direla ziurtatu du ELAk, eta, horregatik, Nafarroako Gobernuari eta udalei eskatu die zainketa aktibatzeko, besteak beste, ez diezaieten behin-behineko langileei kontratua deuseztatu, “dagoeneko gertatzen ari den bezala".
Era berean, "erabaki politiko bat” har dezatela eskatu die, azpikontratatutako langileek soldataren %100 jaso dezaten, baita aparteko ordainsariak ere, eta haien egoerak ez dezan kalterik eragin hartu beharreko urteko opor egunetan.
Sindikatuak informazio eskaerak aurkeztuko dizkie administrazio publikoei, kontrata bakoitzaren egoera zein den jakiteko eta "bizitzen ari garen bezalako egoera batean enpresak modu bidegabean eta diru publikoaren kontura aberastea saihesteko".