Raquel Samitier ilustratzaile nafarrak Vacaciones en casa (Oporrak etxean) haurrentzako album ilustratua argitaratu berri du. Hemezortzi orrialdeko lan bat da, eta Pipa du protagonista, egunotan bere etxean egon behar duen sei urteko neskatoa, egoerari alaitasunez eta baikortasunez aurre egitea erabakiko duena. Egilearen webgunean deskargatu daiteke, dohainik.
Lan horrekin, "entretenimendurako" tresna bat eskaini nahi du Samitierrek. Lau eta zortzi urte bitarteko haurrei zuzenduta dago, eta hura sortzeko, La vita è bella film italiarraren istorioan oinarritu da.
Egilea Humanitateetan lizentziaduna da Nafarroako Unibertsitatean, eta Arte Ederretan Euskal Herriko Unibertsitatean. Noaingo Kultur Etxean egin du lan, kultur teknikari laguntzaile gisa, eta, aldi berean, teknika piktoriko, digital eta narratiboetan trebatu da, hainbat ikastaro eta tailerren bidez. Gaur egun, ilustratzaile profesionala da, eta bere proiektu pertsonala haurrentzako album ilustratuan oinarritzen da.