Koronabirusaren hedapena murrizteko ardura instituzioetatik gizartera ere pasa da. Atzoko 'juevintxoan' jende gutxi izan zen eta hainbat taberna eta kontzertu areto ateak itxi zituzten, krisia irauten duen bitartean horrela mantenduko direla iragarriz.
Peña eta elkarteek ere beren jarduera bertan behera utzi eta jantokiak itxiko dituztela iragarri dute. Larunbaterako Gazteluleku, Jarana, Oberena, Anaitasuna eta Aldapa peñek antolatutako elkartasun bazkaria bertan behera geratu da. Munduko Begiak fundazioaren mesede, pintxopotea eta bazkaria prest zegoen. Antolatzaileek arduraz erabakia hartu dute, egoerak hobera egiten duenean ekimena berreskuratzeko asmoarekin.
