Atzo arratsaldean LAB eta ELA sindikatuek 100 langiletik gorako elkarretaratzea egin zuten Iruñean, Lan Epaitegiaren aurrean, Garbiketako lan hitzarmena negoziatzen zen bitartean. Elkarretaratzean lan hitzarmen duin bat aldarrikatu zuten, horretara iristeko "oraingo negoziazioen norabidea hautsi eta edukietan jauzi nabarmena" eman behar dela azpimarratuz.
Azken bost hilabeteetan negoziazioetan "aurrerapausorik" egon ez dela salatu dute. Hori dela eta, LABk eta ELAk plataforma bateratua eratu dute, lan zentroetan elkarrekin borrokatzeko. Bide horretan, garbiketetako langileei dei egiten diete martxoaren 18an beste elkarretaratze bat egin dezaten, 10:00etan, Ospitalegunean, Vianako Printzea kontsultategiaren parean.