Azken bi egunetan atzemandako kasu gehienak otsailaren 24an Gasteizen hileta batean egon ziren pertsonei lotuta daude; izan ere, hileta hori izan zen kutsadura-iturri nagusietako bat inguruko erkidegoetan. "Ez da pertsona bakarra, pertsona ezberdinak baizik, eta bakoitzak bere kasuen sekuentzia egin du", azaldu zuen Aurelio Barrikarte Nafarroako Osasun Publikoko Institutuko Gaixotasun Transmisiboen ataleko buruak. Hori dela eta, kasu-kopuruak nabarmen egin du gora bi egunen buruan.
Egoera ikusita, osasun zentroetan bisitak mugatzea erabaki du Osasunak. Hala, ospitaleratutako pazienteak pertsona bakar batekin egon ahal izango dira, eta pertsona hori, ahal den neurrian, pertsona bera izango da egonaldian zehar. Gainera, ospitaleratzean, pazienteak eta laguntzaileak gelatik "ahalik eta gehien" ez irteteko eta korridoreetan ez ibiltzeko eskatu dute. Eguneko ospitaleetan, kanpo-kontsultetan eta proba diagnostikoetan, pertsona bakar bati laguntzea ere mugatzea eskatzen da.