Nafarroako Gazteriaren Kontseiluak Gazteriaren Emantzipazioaren Behatokia aurkeztu du. Sei hilean behin egiten du, datu estatistiko ofizialetan oinarrituta, gazteriaren egoeraren argazki bat erakusteko, bi ardatzetan oinarrituz: enplegua eta emantzipatzeko gaitasuna. Gaur goizean, 2019. urteko bigarren seihilekoari dagokion txostena aurkeztu dute, eta datuek erakutsi dute denbora tarte horretan 16 eta 29 urte bitarteko gazteen %21,4 soilik zegoela emantzipatua.
Kopurua beste erkidegoetakoa baino altuagoa da, baina datu negatiboa izaten jarraitzen duela nabarmendu dute gazteriaren kontseilutik. Datu kezkagarri bat jarri dute mahai gainean: gaur egun, Nafarroako gazte batek, etxebizitza bat berak bakarrik alokatzeko, bere soldata garbiaren %67 zuzendu behar du horretara. Etxebizitza partekatuetan, kopurua baxuagoa da, soldataren %31.
Enpleguaren argazkiari begiratuta, hitz bat errepikatzen da etengabe: prekarietatea. Izan ere, Nafarroa langabezia tasa baxuena duen autonomia erkidegoa izan arren, gazteen kasuan, enpleguak bi ezaugarri ditu: behin-behinekotasuna eta lanaldi partzialak. Horri lotuta, datu esanguratsu zenbait eman ditu txostenak; esaterako, pasa den urteko bigarren seihilekoan, behin-behinekotasun tasa %60koa zen gazteen artean, eta garai horretan sinatu zituzten kontratuen %95 aldi baterakoak ziren. Hor generoari ere erreparatu behar zaio, lanaldi osoan lan egiten dutenei dagokionez, ia hamahiru puntutako aldea baitago gizonezkoen (%83,6) eta emakumezkoen (%70,7) artean.
Horri guztiari, gainera, alokairuan nahiz salgai dauden pisuen garestitzea gehitu behar zaio, alokairuen prezioek %9,5 egin baitute gora Nafarroan aztertutako epean.
Egoera horretan, gazteek bi aukera izaten dituzte, kontseilutik salatu dutenez: gurasoen etxean jarraitu ala emantzipatzeko urratsa egin, baina ondoren zailtasunak eduki bizi proiektu propio bat garatzeko.
Eta hortaz, bi eskaera egin diete erakundeei: batetik, alokairurako diru-laguntzen Emanzipa programa adin tarte handiagora zabal dezatela,18 urtetik 22ra eta 30etik 35era arteko gazteentzat ere izan dadin, eta bestetik, Enplegu Plana sortzeko orduan gazteriaren ikuspegia zehar-lerro gisa har dezatela.