Iruñeko 4. Zigor Epaitegiak gizon bat zigortu du, Twitterren 2016ko sanferminetako talde bortxaketaren biktima agertzen zen argazki bat argitaratzeagatik. Bi urte eta egun bateko espetxe-zigorra ezarri dio, sekretuak ezagutarazteagatik eta osotasun moralaren aurkako delituarengatik. 6.000 euroko kalte-ordaina eman beharko dio biktimari, kalte moralagatik.
Zigortuak 2017ko abenduaren 6an argitaratu zuen argazkia Twitterren. Auziaren sumarioan sartuta zegoen argazki bat zen, eta Nafarroako Auzitegiak espresuki debekatu zuen haren zabalpena. Epaiak nabarmendu duenez, irudi horren zabalpenaren ondorioz, bortxaketaren biktima nor zen jakin ahal izan zen, eta horrek ondorio negatiboak ekarri zizkion.
Zigortutako gizonak ideologia ultraeskuindarreko mezuak zabaltzen ditu sare sozialen bitartez, eta, horrez gain, 2015ean Democracia Nacional taldearen zerrendetan izan zen.
Ebazpena ez da irmoa; apelazio helegitea ezartzeko aukera dago, epaitegiak hura jakinarazi eta hurrengo hamar egunetan.