LAB sindikatuko idazkari nagusia, Garbiñe Aranburuk azaldu duenez, Nafarroako Gobernuaren eskumenetan oinarritutako proposamena egin diote Txibiteri: gutxieneko pentsioa 1.080 eurotan osatzea, langile publikoei kalitatezko enplegua bermatzea, berme errenta hobetzea, alokairuko etxebizitza sozialak bermatzea eta administrazio publikoetan 1.200 euroko gutxieneko soldata eta 35 orduko lanaldia ezartzea.
Lan eta bizitza duinen aldeko aldarrikapen gehienak, enpresarien esku daude. Horregatik, sindikatuek, patronalaren aurrean indarra egin dezan eskatu dute, prekarietatea gutxitu eta soldata duinak berma daitezen.
Mesfidati atera da bileratik Mitxel Lakuntza, ELA sindikatuko idazkari nagusia. Hitz politak, ekintzetan islatu behar direla dio Lakuntzak, eta horrelakorik ez dutela aurrekontuen proiektuan ikusi salatu du.
Bi sindikatuek bat egin dute, aurrekontuetan planteatzen den fiskalitatea salatzerako orduan. Diru sarreretan eragina izan behar da, batez ere gehien dutenen ekarpenarekin, gero politika aurrerakoiak egin ahal izateko.
Gaur mahai gainean jarritako eskari eta aldarrikapenak bete ezean, udaberrian mobilizazio egutegi gogorra iragarri dute ELA eta LAB sindikatuek.