Patxi Puñalek ukatu egin du partiden salerosketan parte hartu zuenik

Euskalerria Irratia 2020ko urt. 29a, 12:19

"Ea gaurkoarekin istorio guzti hau pasa eta ahaztu egiten den" adierazi du Osasuna taldeko kapitain ohiak epaitegietatik ateratzean. Lekuko gisa aritu da Puñal epaile aurrean, partiden salerosketak ikertzen dituen prozesuan. "Ez nuen horretaz deus ere ikusi edo entzun" erantzun du Patxi Puñalek galdetu zaionean.

"Ez dakit deus", "Ez nuen ezer entzun horretaz", "Ez nuen ezer ikusi"...horiek dira Patxi Puñalek fiskaltza eta akusazioaren abokatuei emandako erantzunak. Osasunako kapitan ohiak ukatu egin du partiden salerosketan parte hartu zuenik eta azaldu du ez zekiela ezer ez, zuzendaritza horrelako trikimailuetan sartuta zegoenik.

Lekukotza laburra izan da eta epaitegietatik irtenda, kapitulo hau bukatutzat eman nahi izan du Patxi Puñalek. "Ea behingoz hau guztia pasatzen eta ahazten den" adierazi die kazetariei. Epaiketa eta prozesuan entzundakoaz galdetuta, "Hemen norbaitek dirua eraman zuen, diru hori Osasunatik atera zelako" erantzun du Puñalek, "Erruduna topatzen bada, ordain dezala".

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!