Abenduaren 24an sartu ziren Irunberriko gazteak erabilpenik ez duen udal eraikin batean. 29 egunez eraikina egokitzen, jarduerak antolatzen eta udalarekin hitz egiten saiatzen egon ondoren, iragan asteazkenean, hilak 22, lokala itxi egin zieten. Herriguneko kideek azaldu dutenez, bi udal ordezkari bertaratu ziren, langileekin batera, eta abisurik gabe atea hormatu zuten.
Erika Herriguneko gazteek salatu dutenez, “denbora asko” daramate lokal autogestionatu baten beharra aldarrikatzen. 2018ko udan hasi ziren lanean, eta behin baino gehiagotan bildu izan dira udal ordezkariekin, baina haiengandik “borondate falta” egon dela salatu dute: “Ez dute udal espazio bakar bat ere egokitzeko asmorik erakutsi, eta denbora pasatzen utzi dute”. Egoera horren aurrean erabaki zuten eraikinean sartzea, baina argi utzi nahi izan dute urrats horrekin ez zituztela negoziaketak moztu nahi izan, horiek “berehalakoak eta eraginkorrak” izan daitezela baizik.
Eraikina ireki eta bi egunera, Foruzaingoa bertaratu zen, gazteen hitzetan, “neurriz kanpoko dispositibo” batekin. Egun berean hiru udal ordezkarik errekerimendu bat eman zieten herriguneko kideei, eta haiek elkarrizketarako borondatea erakutsi zieten, baina erantzuna ezezkoa izan zen. Gobernu taldearekin biltzeko instantzia bat baino gehiago ere aurkeztu dute, baina, esan dutenez, ez dute erantzunik jaso.
Hilaren 15ean ezohiko osoko bilkura bat egin zuten, EH Bildu udal taldeak eskatuta –proiektuaren alde agertu da talde hori–, AIL Agrupación Independiente Lumbierina taldeari eskatzeko gazteekin negoziatzera esertzeko, baina erantzuna ezezkoa izan zen. Hurrengo egunean, lokaleko argia moztu zuten; ondoren, iragan astelehenean, atean zuten giltzarrapoa kendu zieten, eta azkenik, asteazkenean, eraikina hustera joan ziren.
Egoera horren aurrean, gazteek manifestaziora deitu dute, biharko, arratsaldeko 18:00etan, herriko Foruen plazatik abiatuta, gazteriarentzako lokal bat eskatzeko eta udalari eskatzeko gazteekin hitz egin dezala.