Nafarroako Auzitegiko Lehen Auzialdiko 2 zenbakiko Epaitegiak atzera bota du Navarra Sumako parlamentari Iñaki Iriartek Santos Cerdan PSOEko diputatuari eta Lurralde Koordinaziorako idazkariari aurkeztutako demanda. Aurtengo abuztuaren 25ean, Iriartek 1936an hildako lehen erreketearen omenezko bazkari batean parte hartu zuen, Leitzan. Eta horren karietara, Cerdanek faxista deitu zuen Iriarte.
Iriartek epaiketan une oro ukatu zuen faxismoaren edota frankismoaren gorazarre ekintza batean parte hartu zuenik eta frankista zenik. Parlamentaria izateaz gain, Iriarte EHUko irakaslea da, eta esan zuen Cerdanen adierazpenek laneko ondorioak izan dituztela. Horregatik guztiagatik, 10.000 euroko kalte-ordaina emateko eskatu zuen.
Fiskaltzak ere iritzi bera agertu zuen, baina kalte-ordaina 100 eurora jaitsita.
Santos Cerdanen defentsak, berriz, frankismoa goratzeko ekintza bat izan zela azpimarratu zuen, eta, beraz, eskaria atzera botatzeko eskatu.