“Egoerak okerrera egin du” azaldu dute Zaporeak proiektuko arduradunek, “Egunero ehunka pertsona ailegatzen dira Lesboseko errefuxiatuendako guneetara, milaka dira bertan pilatuta. Urik ez, komunik ez,…konzentrazio esparru bat ematen du irlak”. Horregatik pertsona errefuxiatuak laguntzen jarraitzea beharrezkoa da. Zaporeak egitasmoak janaria eramaten du errefuxiatu gune hauetara, ahal den neurrian lagundu ahal izateko. Proiektua laguntzeko eta bultzatzeko musika jaialdi bikoitza antolatu dute Zentral aretoan.
Urtarrilaren 24ean Komando Funk, Muxutrock eta Acoustic Sound Machine-ren kontzertua izanen da. Sarrerak 10 euroko salneurria izanen du, elkartasun proiektura bideratuko direnak. Urtarrilaren 30ean aldiz Travellin Brothers taldea izanen da eskenatokian. Kontzertu horretarako publikoari eskari berezia egin dio taldeak: Lesbosera eraman daitezken jakiak eraman ditzatela sarrera moduan. Taldeak gainera konpromezua hartu du, biltzen duten jaki eta bazkari kopurua bikoiztuko dutela Zaporeak proiektuari entregatzeko.