Bai Nafarroan eta baita estatu mailan ere, negoziaketen inguruan piztu diren eztabaiden argudioetako bat izan da. Eskuinak alderdi sozialistari leporatu dio EH Bildurekin negoziatu eta akordioak lotu izana. Navarra Sumak “lotsagarria”, “terrorismoaren biktimendako iraingarria” edo ta “demokraziaren kontrako eraso” bezalako terminoak erabili ditu bilera hauek kritikatzeko. Diario de Noticias egunkariak salaketa hauei erantzun die hemerotekari erreparatuz. 1993an aurrekontu negoziaketak egin zituzten UPNk eta Herri Batasunak. “Garai gogorrak ziren” azaldu du Euskalerria Irratian Patxi Zabaletak, garaiko HBko parlamentariak ‘berunezko urte’ horiek gogoratuz, “Gutxiengoan zen UPN une horretan eta gure babesa behar zuen aurrekontuak aurrera ateratzeko, baina azkenean ez ginen konpondu”.
“Orain, UPNko kideek egiten ari diren moduan, negoziaketa horiek ukatzea gezurra esatea da” esan du Zabaletak. Zentzu horretan atzerakada nabarmena somatu du politikari ohiak eskuinako parlamentariengan, “Ea eskuinerago nor kokatzen den borrokan dabiltza” salatu du, “Borroka horretan UPNren nafarzaletasunak galdu egin du argi eta garbi, eskerrak badagoen Nafarroako interesak defendatuko duen beste indar politikorik”
