Madrilgo Hortaleza auzoko Adingabeen Lehen Harrerako Zentroaren aurka abenduaren hasieran egin zuten erasoa gaitzetsi egin du Nafarroako SOS Arrazakeriak. "Nafarroatik gure gaitzespen eta sumindurarik sutsuena adierazi nahi dugu". Erasoa "sektore politiko jakin batzuen" diskurtso "arrazista, homofobo, transfobo eta matxistaren" barruan kokatu dute: "Diskurtso horien arduradunak erantzule egin nahi ditugu, izan ere, beren estrategia bultzatzeko asmoz, argudioak bulo eta gezurretan oinarritzen dituzte".
Diskriminazioa eta bazterkeria gainditzeko, "premiazkotzat" jo du plataformak salaketa sareak eratzea eta indartzea. "Premiazkoa da salatzea estatuak ez duela betetzen guztiak babesteko betebeharra. Babesgabetasun hori da, hain zuzen ere, sektore politiko honek erabiltzen duena, Estatuaren jarduna salatzeko ordez, adingabeak berak erasotzeko eta kriminalizatzeko".